والدى تقريبا ميعرفش انى عندى مدونة ع النت و بكتب فيها و كده

حبيت أبعت له الرسالة دى – جايز يوم من الأيام يقرأها لو دخل المدونة بالصدفة

لو كان للمرء أن يهدي كما يهوى
لأهديت لك الدنيا بما فيها إلا مواجعها
أمنيتي لك من إله الكون منزلة
هي من جنان الخلد أرفعها و عاليها
لك التحية و الأشواق مرسلة
لك المعزة في أسمى معانيها

ويارب ترجع لنا بالسلامة – اللهم آمين.

سلام عليكم

اليومين دول من أكثر الأيام لبخة عندنا فى الكلية ,,

امتحانات شفوى و عملى ,, ربنا يكون فى عون الجميع

الظريف بقى أن عندنا امتحان , DataBase يوم الثلاثاء

و داتابيز يعنى دكتور هشام (رئيس القسم) ,,دكتور محترم جداا

و طبعا غنى عن التعريف.

افتكرت لما كان الدكتور بيعطينا شبكات فى سنة أولى ,,

و عندنا امتحان شفوى , و المفروض ناخد معانا المحاضرات وغيره  (اى حاجة تبع المادة)

الطريف جداا,, ان مكنش معانا محاضرات

كمان كنت لسه شارى اللاب توب جديد , و كنت عملت سلك نت خمسة متر علشان أوصل

اللاب بتاعى بـ اللاب توب بتاع السيد و نلعب شوية و أحنا فى الكلية أو عنده فى البيت

عملنا ايه بقى ,, مفيش محاضرات ولا حاجة ندخل بيها

أخدنا السلك فى كيسة سودة و دخلنا للدكتور

المنظر كان عجيب فعلا , الطلبة كلها واقفة بكشكول و محاضرات بقى و كله بيجهز للسؤال اللى هيتساله جوه

و احنا داخلين بشنطة سوده و فيها سلك نت و أخضر كمان ( علشان تكمل )

الدكتور سألنا : ايه ده ,, قلنا : ده سلك عملناه علشان نوصل جهازين ببعض , حاجة بسيطة كده

سألنا جبتوا الألوان بتاع التأريج منين ,, من ع النت يادكتور ( جوجل ربنا يخليه )

بص لنا كويس جدا , و قال لنا تمام ,,

كانت أول مادة أجيب فيها جيد جدا فى الكلية الجميلة دى

نفس الدكتور بقى يوم الثلاثاء الجاى ,, و شفوى و الدكتور قال هاتوا أى حاجة معاكوا ( حاجة ترفع الدرجات )

المشكلة انها قواعد بيانات ,, ولازم ندخل بحاجة , فالتاريخ بيعيد نفسه

ياترى لو دخلت بنفس السلك الأخضر , هيبقى الوضع مختلف )

ان شاء الله نفكر فى حاجة و ندخل بيها . ( بس نذاكر المادة الأول )

ذكريات لذيذة

سلاااااااااااام