والدى تقريبا ميعرفش انى عندى مدونة ع النت و بكتب فيها و كده

حبيت أبعت له الرسالة دى – جايز يوم من الأيام يقرأها لو دخل المدونة بالصدفة

لو كان للمرء أن يهدي كما يهوى
لأهديت لك الدنيا بما فيها إلا مواجعها
أمنيتي لك من إله الكون منزلة
هي من جنان الخلد أرفعها و عاليها
لك التحية و الأشواق مرسلة
لك المعزة في أسمى معانيها

ويارب ترجع لنا بالسلامة – اللهم آمين.

سلام عليكم

أعزائى زوار المدونة , ده لو لسه فى زوار

بعد انقطاع دام حوالى شهر او أكثر , رجعت المدونة المهجورة تانى لعملية إعادة الإعمار

مع بداية السنة الجديدة

تم ضم المدونتين ( الشخصية + التقنية ) فى مدونة و احدة , لتوحيد الجهود و لم الشمل

و ان شاء الله هيكون فى متابعة منى أكثر من كده ,

الفترة اللى فاتت كانت مليئة بالأحداث ,, و مفيش فرصة الواحد يدخل المدونة يكتب عن أى حاجة .

بس الحمد لله , لسه الأمل موجود , و رجعت تانى

من أحد الاشياء المهمة اللى حصلت لى هى انى اشتغلت فى شركة ITEC كـ Web developer / Instructor

و ماشاء الله , الشركة ممتازة جدا عكس ماكنت أتصور + فريق عمل ممتاز و متعاون (ربنا يكرمهم جميعا)

و الأطرف بقى انى قررت أكمل فى البرمجة , و بدأت بالفعل , ( بعد ماكنت على وشك امتحن CCNA )

لكن الحمد لله , البرمجة حلوة برده , كفاية انك بتشوف نتيجة قدامك , تتعلم حاجة وتطبق و تعمل بروجيكت مع نفسك

وداعا 2009 بما فيكى من أحداث و خبرات كثيرة اتعلمت منها كتير جدا ( من أحد أهم السنة اللى عمرى ما هنساها)

و أهلا 2010 , و أتمنى 2010 تبقى أفضل بكتير , و أحقق كل اللى بتمناه , و تبقى سنة سعيدة ع الكل .

بالنسبة للمدونة , ان شاء الله هحاول اتابع فيها بإستمرار ( على الرغم من الأمتحانات المزعجة – دعواتكم معانا )

و ان شاء الله اغير الثيم ده فى أقرب وقت ممكن .

ان شاء الله هتكلم هنا عن أى حاجة , مش شرط تقنى او شخصى .

لو حابب تتابع أو كنت بتتابع ( ده لينك الـ RSS الجديد )

أتمنى لكم حياة سعيدة و ناجحة

بالتوفيق ان شاء الله

سلام عليكم